Në 12 shtator 2025, në ambientet e Hotel Colombo në Berat, Helvetas dhe Partnerët Shqipëri për Ndryshim dhe Zhvillim organizuan tryezën e rrumbullakët me temë “Fuqizojmë Partneritetet Rajonale dhe DMO-të”, një aktivitet strategjik që synon të nxisë zhvillimin e turizmit të qëndrueshëm në Qarkun Berat. Ky takim mblodhi së bashku përfaqësues të institucioneve publike, bashkive vendore dhe ekspertë të turizmit për të diskutuar rolin e Organizatave për Menaxhimin e Destinacionit (DMO) në krijimin e modeleve inovative dhe të integruara të turizmit. Shembujt e suksesshëm si Visit Gjirokastra dhe Visit Saranda frymëzuan diskutime mbi bashkëpunimin publik-privat dhe sinergjinë rajonale.

Gjatë aktivitetit, pjesëmarrësit patën mundësinë të dëgjojnë nga figura kyçe si Donald Molishti, Kryetari i Qarkut Berat, përfaqësues nga Ministria e Turizmit dhe Mjedisit, si dhe Gramos Osmani, Drejtues për Sektorin Privat në Helvetas. Diskutimet u fokusuan në integrimin e DMO-ve në strategjinë kombëtare të turizmit, krijimin e një mjedisi të favorshëm për partneritete rajonale, si dhe në ndarjen e praktikave më të mira për turizmin e qëndrueshëm. Kontributet e Eva Kushova, eksperte e turizmit të qëndrueshëm, dhe Terena Cardwell nga Green Destination Balkan, sollën perspektiva të reja mbi standardet e qëndrueshmërisë dhe përfshirjen e aktorëve lokalë në menaxhimin e destinacioneve.

Ky aktivitet është pjesë e projektit për punësimin e të rinjve, i mbështetur nga Agjencia Zvicerane për Zhvillim dhe Bashkëpunim (SDC), me synimin për të promovuar modele të qëndrueshme për turizmin në Shqipëri—modele që sjellin përfitime ekonomike, sociale dhe mjedisore për komunitetet lokale. Diskutimi i hapur me përfaqësues nga sektori privat dhe bashkitë e qarkut përforcoi angazhimin për një vizion të përbashkët, ku Berati pozicionohet si një destinacion me potencial të lartë për zhvillim të qëndrueshëm dhe inovativ.