Më 5 Dhjetor 2024, Helvetas organizoi konferencën "Këshimi i Karrierës në Shqipëri: E Tashmja dhe e Ardhmja". Ky event i rëndësishëm mblodhi së bashku ekspertë, përfaqësues publikë dhe privatë, dhe aktorë të ndryshëm për të diskutuar zhvillimin e shërbimeve të udhëzimit të karrierës. Konferenca u përshëndet nga znj. Olta Manjani, Zëvendësministre e Ekonomisë, Kulturës dhe Inovacionit dhe z. Philip Arnold, Zëvendësambasador i Zvicrës në Shqipëri.

Fjala kryesore nga znj. Jaana Kettunen, Zëvendësdrejtore e Institutit Finlandez për Kërkime Arsimore, tregoi se si AI mund të revolucionarizojë udhëzimin e karrierës, duke fuqizuar individët të bëjnë zgjedhje më të mira për arsimimin dhe punësimin.

Konferenca theksoi arritjet dhe sfidat e zbatimit të këshillimit të karrierës në Shqipëri, rolin e institucioneve shtetërore, dhe ndikimin e përvojave ndërkombëtare dhe përparimeve teknologjike. Paneli i parë trajtoi sfidat dhe nevojën për koordinimin e ofruesve publikë të këshillimit të karrierës për të krijuar një sistem efektiv karriere në Shqipëri. Ai u përqendrua në zyrat e para të këshillimit të karrierës të krijuara në vend dhe strukturat ekzistuese. Konferenca përfundoi me një diskutim në panel mbi rolin e medias në udhëzimin e zgjedhjeve të karrierës së të rinjve, duke i fuqizuar ata të marrin vendime të informuara për zgjedhjet e tyre profesionale.

Gjatë 12 viteve të fundit, Helvetas në Shqipëri ka kontribuar ndjeshëm në ekosistemin e këshillimit të karrierës në Shqipëri përmes projektit 'RisiAlbania', mbështetur nga Agjencia Zvicerane për Zhvillim dhe Bashkëpunim (SDC). Projekti ka punuar për zhvillimin e sistemit të këshillimit të karrierës dhe mbështetjen e aktorëve kryesorë në ofrimin e këtij shërbimi si një e mirë publike nga autoritetet lokale. Projekti gjithashtu ka kontribuar në përmirësimin e shërbimeve për studentët në universitetet publike, integrimin e edukimit për karrierën në sistemin parauniversitar, dhe ka përmirësuar programin master në orientimin profesional në Fakultetin e Shkencave Sociale të Universitetit të Tiranës.