Visit Gjirokastra është kthyer tashmë në organizmin e parë në Shqipëri që promovon një destinacion rajonal si markë në tregun ndërkombëtar. Agjencia Kombëtare e Turizmit, nëpërmjet këtij bashkëpunimi me Visit Gjirokastra, ka përqafuar tashmë promovimin jo vetëm të vendit në tërësi, por edhe rajoneve shqiptare si destinacione specifike.

New Deal Europe është eventi më i madh ndërkombëtar për Ballkanin dhe Evropën Juglindore dhe pjesëmarrja e Shqipërisë përmes Visit Gjirokastra është mbështetur nga Agjencia Kombëtare e Turizmit, Programi Zviceran i Promovimit të Importit (SIPPO) dhe RisiAlbania.

Eventi i kushtohet promovimit të destinacioneve ballkanike në tregjet ndërkombëtare me vlerë të lartë. Më 4 prill, përfaqësuesit shqiptarë nga Visit Gjirokastra dhe kompani lokale mundën të takonin mbi 100 operatorë turistikë ndërkombëtarë nga e gjithë bota, përmes takimeve të regjistruara paraprakisht në New Deal Europe Marketplace dhe Forumin e 2022 në Londër.

E njëjta mundësi u jepet atyre që nuk mund të bashkohen në versionin fizikisht përmes pjesëmarrjes në takimin virtual të organizuar më 11 prill në platformën B2B online të New Deal Europe.

Qëllimi kryesor i pjesëmarrjes ishte promovimi i Shqipërisë si një destinacion unik në zhvillim, dhe një destinacion i sapo transformuar si Gjirokastra, nëpërmjet ndërhyrjeve të personalizuara të projekteve zvicerane dhe donatorëve të tjerë. Si rezultat, Visit Gjirokastra arriti të zhvillojë 17 takime B2B me operatorë dhe agjenci turistike të ndryshme nga Britania e Madhe, SHBA, Gjermania etj, me të cilat ka nisur negociatat për bashkëpunime konkrete.