Përmirësimi i shërbimit të klientit është thelbësor për të rritur besueshmërinë dhe përdorueshmërinë e shërbimeve të Agjencisë Kombëtare të Punësimit dhe Aftësive, si nga ana e punëofruesve, por dhe punëkërkuesve. AKPA me mbështetjen e RisiAlbania ka zhvilluar Sistemin e Matjes dhe Monitorimit të Kënaqësisë së Klientit. Ky është një sistem informatik i cili i vjen në ndihmë AKPA për të arritur objektivat e saj në përmirësimin e shërbimeve të ofruara si edhe rritjes së kënaqësisë së qytetarëve dhe menaxhimit të ankesave në kuadër të standardeve të shërbimeve.

Gjatë muajit Tetor 2020 u pilotua Sistemi i menaxhimit të ankesave në Drejtorinë Qëndrore të AKPA, duke analizuar burimet nga vijnë ankesat, tipin e ankesave dhe menaxhimin e tyre. Gjetjet e këtij procesi u prezantuan më 27 Nëntor në një tavolinë ‘të rrumbullakët’ online, me përfaqësuesit e të gjithë institucioneve pjesë e AKPA, ku sistemi do të implementohet.

Gjithashtu, si pasojë e këtij procesi, në hyrjen e cdo institucioni të AKPA është vendosur informacion i dukshëm, për të informuar të gjithë klientët (punëkërkuesit dhe bizneset) mbi mundësinë e drejtimit pranë AKPA për çdo informacion, ankesë, apo paqartësi që ata mund të kenë.

RisiAlbania ka mbështetur AKPA me zhvillimin e Sistemi i Matjes dhe Monitorimit të Kënaqësisë së Klientit si pjesë e strategjisë për përmirësimin e mëtejshëm të bëshkëpunimit të AKPA me biznesin. Kjo mbështetje vjen në vijim të zhvillimit të Metodologjisë së Bashkëpunimit me Biznesin dhe Analizës Rajonale të Tregut të Punës.